Eko da se pohvalimo, kako prihaja dan svršetka snimanja CD-a, smo počeli pomalicon pušćat pjesmi van, pa tako, ekskluzivno, do 20.12.2009. leta samo na valovima Radija Istre (Pazin) morete tu i tamo počut naš hit singl Daj si kuraja, pa ku fini na kakove TOP liste, vi si samo dajte kuraja i išćite GRRINTO. Kuku.
Smo svirili va Orbane va Žminje suboto i sople so anke Zapeljivke, zapeljivkice male, a kantajo ko vele! Bilo je brdo ljudi i svi kunienti, definitivno su se iskristalizirali hitovi, a na vrh je skočila “Daj si kuraja”. A i te druge naše liepe pjesmice ludi već imajo rad! Škuro : )
Imamo i par slikic da vidite kako smo liepi svi skupa:
Dragi člani našega još drajžega benda (drajžega : ), po ovie česte Vas zoven da se odazovete va cielen broje na pruovi kako bi malo bolje sopli pietak ča pride 11.12.2009. i to jušto va Orbane va Žminje. Ki ne pride će ga ćepat sankcije! Pruovi so nedeljo va uro ko se juštamo suboto!
Vaša GRRINTA.
Danas ćemo napisat jeno kombinirano poruko, aš se zadnjeh desietak dana čuda tega videlo! Bili smo va Rijeke, pak va Pazine je sopa GRRINTA Cover bent, dva mladića z gitarami i piče pjesmice od Grrinti. Mrak,.. za tien smo šli va Pulo, kade smo rasturili parkirališe (z mjuzon, da ne pensate ča drugo), perfin smo Va novine finili, i jušto kako i kruh ča zustane za supon va bukalete, smo zasvirili i doma, va Žminje, puli Ermana i baš smo liepo svirili, ma ni jako imie ki čut. Anke smo nešto snimali, üjža krrf!!!
Va Rijeko so nas zvali da pridemo sa još jenien bendon svirit na brod NINA2, i to četrtak, za naše nadi, mlade studentice i studentoši. Ma hi je bilo liepo i videt, sve mlada i rumena, pjana lica, jušto kako bi i triebalo bit va njiheh letah. Bilo je nikad tako grdo vrieme na puote za doma, ma smo steši rivali doma bez kusi viška! Suboto za tien, je Ratko ša van i ča ni va Pazine, va Onyxe, naša duo ki se hvali da so Radio Experiment – GRRINTA Cover Bent. To ni bez vraga!
Pak smo šli sost va Pulo, va samen centre, na parkinge zad faxa je bila bina, i razglas, samo da je bilo malo više ljudi bi bilo mrak mrakova, a ovako su na koncerte bili samo najjači zaljubljenici va štabele note! Oni znajo ča valja. Svirili smo mi i Veja i Filji di Bruno Atomico i tako liepo svi skupa smo zaprli festival KUFer, pobrli se pomalo i šli za Žminj, aš smo drugi dan (suboto) svirili na otvorenje Lanoton butiegi va Žminje, zdol butiegi od Ermana skupa z The Night Expresson, kien se zahvaljujemo ča so nas puštili sost na njihov novi razglas, bez straha od svinjske grrinti!
Imamo i par slik, i najavo da smo finili prvi singl! Samo da još danas pasa presluhievanje naokolo i šaljemo na radija. Pak morete zvat raznorazne škatulice i iskat glazbeno željo: GRRINTA – Daj si kuraja.
Imamo i nešto slik!
Ćemo samo reć za počietak da Dejo snima gitari! I da će bit gotovo! Niš drugo ne pitajte.
Koncerti ča zasad znamo da svirimo:
05.11.2009. – Nina (Brod) – Rijeka / Brucošijada RI Veleučilišta
13.11.2009. - Parkiralište iza faksa - Pula / Zatvaranje festivala KUFer
14.11.2009. - Parking Erman komerca – Žminj / Lanoton butiega
11.12.2009. – Orbano Žminj / Grrinta [ŽNJ] + Zapeljivke [SLO]
Prišla je i ta ura, naglas moremo reć da imamo i pravi fanovi!!! Kako to znamo? Ha ha, pa lahko, imamo već dvije GRRINTA grupe na fejsbuke ke so napravljene od strane fanovi (imamo mi i svojo, ali nu!), i na koncerte nan ljudi kantajo sve pjesmi od počietka do kraja! Verujte nan da ćemo znat cijenit vaše zalaganje i trud. Andrejina vodi dnevnik koncertnih aktivnosti i ocjenjuje zalaganje na koncertah. Nekakor nan se para da zasad žienski klan ima bolje ocjene! A Merikane!? E pa Merikane so bile koncert sa najmanje opreme dosad, svi mi i dva zvučnika i to je to! Ki čuje čuje, a bi reć da se čulo, uee heej!
Bilo je svega ta pietak. Par rođendani, kolači, biri pokle čiiza, promocija nove pjesme kojsto do oniput nanke Luka ni nikad ču, ali je steši odsviri (inače to je pjesma če će bit prvi singl sa drugega CD-a, čim snimimo i objavimo prvi!). Sestri Benčić so nan malo zakantale s nami, znatiželja je ubila mačko, a strah je vragu brat! Odsad ćemo fanovi ki se buodo najveć iskazali na koncertnen polju zvat va gosti na probe! To će bit čast! Ulaznica za probe je: ili jena vela plastična boca od Favorita (1,5 litara + 0,5 litri GRATIS) – HLADNA, ili 2 litri Juica od naranči isto HLADNO (za temperevat imamo – ali ku ča još donesete ne smeta!) i zamite si ku ćete i vi ča popit! (šala mala)Ku pensate da smo ča tuo preskočili rinite besedo va komentari! Ala pravi prieteli!
I to sve va jeno večer! Pak eko, pomalo smo prišli va se i sad van moremo i dva slova napisat, za oni ki niso rivali zbog ovega ali onega! Najprvo da rečen da nas je ta dan okoli puolne zva Neno z Roča, da imajo humanitarni koncert va Roče, za Denia Muzicu kega je ćepa neki grdi tumor i da mu je jedan bend zarad gripi usta doma, pa ku bimo mogli prit mi zasvirit. I sad, mi mu guriomo, stvar je takova i takova, mi imamo koncert va Pazine i nikakor ne rivamo prvo jene i puol, a uon guori super, taman! I tako je priša ta poziv! Ali nu, homo po riede!
Prišli smo va Pazin, malo pokle dažlja, prontali sve ča rabi, videli da je mali prostor i da će bit bučno, ali ča je tu je. Svi z pogledon va očivah: “Ki zna kako će pasat prva svirka va drugen komune?”. A Memo je bi prekuntenat da nas vidi. Pomalo so se fanovi nakupili i komoć pasali kroz mića vrata va zide i mi smo zaorali prvo brazdo, pak drugo, pak treto, pak četrto, pak pieto, pak šiesto, pak ni pieto ni šiesto, pak uosmo, pak devieto, pak desieto, pak jedanajsto, pak puolne i smo šli počinut! Prišla je VEJA, a oni so to večer bili na domaćen terene i to se vero moglo osjetit, aš so bili predobri, imeli so i gosta, onega črnega ča sviri gitaro va GRRINTE, ma znate onega, kako mu je ime… Pak smo još malo svirili mi, finili, pobrli inštrumienti (uz velikosrdnu pomoć fanovi Seboeta i Andreji) i smo partili puot Roča.
Dejo i Tubak so bili skupa va veture i peljali so harmoniko, pak so kantali da gredo z armonikun va Roč! A kad smo prišli va Roč smo rekli da je vrieme za “Roč’n'roll”! Dobili smo backstage i gledali Gustafi kako oruo. A kad bi njin ča zapelo, Andrejina je uskočila kako z otkon i sve bi riešila, ča bi se reklo, je dala fajnl tač! Anke muoramo priznat da so ljudi bili toliko izmoreni pokle Gustafi da je većina bila na terase od doma nego va same sale, ali tu so bili naše najvjernije fanice i fanići, ki so bili i na prven koncerte va Pazine i oni su si liepo dali maha i pliseali i skakali pa nan se z bini paralo kako da s nami ciela sala kanta! Pleti, pleti Zvane… kako da je čier bilo.
Šli smo pomalicon i za doma, na onaj E…dex va Pazine pojest pizzi, najprvo smo se upoznali z osobljen, ku kega intereša, ona konobarica je njemica, ni slovenka, i zove se Kristina ili Klaudia, bi ga vrah sad, ali ne se zove ni Milka ni Una ni Karen ni nikakor drugajče. Ono ča je ustalo, Ratkić si je zie za doma, aš uon je sad student, a oni ipak jeno malo drugajče gledajo na jest. Ča je doma pod pusteljon to je sigurno, osim ku se brat ne stane prvi pa nanjuši! 100% je i uon student, ha ha.
Suma sumarum: Va dva i puol meseca ča postojimo, već smo imeli šiest koncerti, dva koncerta va isten dane, svirili na humanitarnen koncerte, snimili smo već od puol CD-a i Gustafi so nan bili predgrupa! Kamo bolje!? Kuku.
Imamo i par slik, pak hvala Kristine Skeri Komar ča hi je puštila va sviet!
Podijeli - Share
