Eko, pozvani smo na Radio Pulu da rečemo par besied o nami! Utorak 22.06.2010. na 20:05 ur navečer, zajno pokle Vijesti ćete nas moć čut! I naši glasi i kakovo pjesmico, nu, kad smo već tamo, a imajo i radijo na radie! Se slušamo. QQ
Eko naši dragi fani, smo van pronatli malo već slikic od Merikan 10.04.2010. (Mordor). Fešta je bila prekrasna. Hvala svine Van ki ste s nami pasali još jeno liepo večer, vero nuoć. Bi reć da je i ovako dobro, aš svi da so kuntienti. Pak nu ubajdite po slikah kako je bilo, i vidimo se na sljedećen koncertiće. QQ.
P.S.
Veliko hvala Prijateljima na svesrdnoj pomoći u našen probitku ka zvjezdama : )
EKo, ku je ki riva preskočit naš i prijateljski koncert pasani pietak va Orbane, to suboto na 10.04.2010. morete čut 2. dio mega performansa GRRINTA + Prijatelji LIVE Band = GRRIJATELJI.
Pasajte, aš ulaz je za nič, cuga ča i za nič, a zabava takova da se to ne more platit!
Dajte si QQ i se vidimo!
Alo ljudi, veseli, živi i zdravi bili! Za nas je finila korizma, imeli smo dvije pruovi i sad smo pruonti za novi koncerti, nastupi i afteri! Se fanice i fanovi čujte: GRRINTA iz beck! A kako se sad to čuje, ćete muorat prit posluhnut ta pietak, i to ne bilokakuov, nego Veeeli pietak, 02.04.2010. va Orbano kade ćemo sost uz Prijatelji LIVE band, cremé de la cremé od žminjskeh bendi! Ki ne pride će pokle muorat iskat po fejsbuke, a ku ne najde će mu bit žal! Zato rezervirajte soje mesto već danas, aš da će bit veli konfužiuon na veli pietak va velen Žminje, z najveći bendi!
Dragi naši, malo smo se zatihnuli zadnjeh dan, aš svega delamo! Svirimo, snimamo, kantamo i pišemo za pršut i drugo! Malo smo kako gosti sopli va Orbane, malo po doma malo naokolo, i kako nima baš smisla pisat za nazad, znajte da delamo i da ves niećemo zabit.
O ljudi! Sveh Vas zovemo da pridete va Merikane, h Modrušanon, ta četrtak 24.12.2009. da liepo si skupa dočekamo tega Božičića. Ku Vi buodete od volji ćemo bit i mi, pak forši anke ča zasopemo, a forši i zakantamo! Prridite!
Smo svirili va Orbane va Žminje suboto i sople so anke Zapeljivke, zapeljivkice male, a kantajo ko vele! Bilo je brdo ljudi i svi kunienti, definitivno su se iskristalizirali hitovi, a na vrh je skočila “Daj si kuraja”. A i te druge naše liepe pjesmice ludi već imajo rad! Škuro : )
Imamo i par slikic da vidite kako smo liepi svi skupa:
Danas ćemo napisat jeno kombinirano poruko, aš se zadnjeh desietak dana čuda tega videlo! Bili smo va Rijeke, pak va Pazine je sopa GRRINTA Cover bent, dva mladića z gitarami i piče pjesmice od Grrinti. Mrak,.. za tien smo šli va Pulo, kade smo rasturili parkirališe (z mjuzon, da ne pensate ča drugo), perfin smo Va novine finili, i jušto kako i kruh ča zustane za supon va bukalete, smo zasvirili i doma, va Žminje, puli Ermana i baš smo liepo svirili, ma ni jako imie ki čut. Anke smo nešto snimali, üjža krrf!!!
Va Rijeko so nas zvali da pridemo sa još jenien bendon svirit na brod NINA2, i to četrtak, za naše nadi, mlade studentice i studentoši. Ma hi je bilo liepo i videt, sve mlada i rumena, pjana lica, jušto kako bi i triebalo bit va njiheh letah. Bilo je nikad tako grdo vrieme na puote za doma, ma smo steši rivali doma bez kusi viška! Suboto za tien, je Ratko ša van i ča ni va Pazine, va Onyxe, naša duo ki se hvali da so Radio Experiment – GRRINTA Cover Bent. To ni bez vraga!
Pak smo šli sost va Pulo, va samen centre, na parkinge zad faxa je bila bina, i razglas, samo da je bilo malo više ljudi bi bilo mrak mrakova, a ovako su na koncerte bili samo najjači zaljubljenici va štabele note! Oni znajo ča valja. Svirili smo mi i Veja i Filji di Bruno Atomico i tako liepo svi skupa smo zaprli festival KUFer, pobrli se pomalo i šli za Žminj, aš smo drugi dan (suboto) svirili na otvorenje Lanoton butiegi va Žminje, zdol butiegi od Ermana skupa z The Night Expresson, kien se zahvaljujemo ča so nas puštili sost na njihov novi razglas, bez straha od svinjske grrinti!
Imamo i par slik, i najavo da smo finili prvi singl! Samo da još danas pasa presluhievanje naokolo i šaljemo na radija. Pak morete zvat raznorazne škatulice i iskat glazbeno željo: GRRINTA – Daj si kuraja.
Imamo i nešto slik!
Ćemo samo reć za počietak da Dejo snima gitari! I da će bit gotovo! Niš drugo ne pitajte.
Koncerti ča zasad znamo da svirimo:
05.11.2009. – Nina (Brod) – Rijeka / Brucošijada RI Veleučilišta
13.11.2009. - Parkiralište iza faksa - Pula / Zatvaranje festivala KUFer
14.11.2009. - Parking Erman komerca – Žminj / Lanoton butiega
11.12.2009. – Orbano Žminj / Grrinta [ŽNJ] + Zapeljivke [SLO]
Podijeli - Share