Ojla ljudi, ča ste ča, ćo! GRRINTA ni nestala, samo smo se jeno malico zatajili aš smo šli snimat drugi ČeDe. Zasad radnega imena “Drugi”. I samo da znate da smo već snimili već od puol, pak ku ne verujete, da ne buo da sliepimo ćemo ovako kroz inter net najavit novi singl, i mikrospot (to ti je oni spot kad se niš ne miče nego samo sliki gredo, kako slajdšo, ali ono kad se anke čuje kanta kako sviri).
Novi singl se zove “Na ti me” i ku buo se va riede za dan-dva-tri je tu samo za Vas da ga posluhnete, zapoštate i kantate kad van je teško, liepo, grdo, debelo, tanko, ku puše bura ali grad ku pada, vajk će bit štabela kancuonica kojsto ćete si zá rada kantat. Bimo van to kanto bili puštili i prvo, ali smo jo poslali na festival “Andrej Baša i prijatelji” i buduć da mi nismo prijatelji nego Grrinta, i nimamo šoldi, nismo upali a nismo Van jo smeli puštit dok se oni ne spensajo ku će jo, ali ne! Pak ni do sad nan niso javili, a mi drugo ne čekamo nego ćemo Van jo puštit da posluhnete i da nan date suoj penas : )   A dok počekamo ta hit ubajdite par sliki od našega snimanja, a bit će hi još. QQ

Podijeli - Share

Na si Tri Kralji nabot 06.01.2012. ćemo imet probe na bine puli Merikan, aš to će nan bit zadnja pruova prvo nego ča suboto počnemo snimat 2. CD va naše fonografije! A kako će hodit va uho ti novi hiti pridi videt pietak na 23:14 z večera. QQ

Podijeli - Share

Naslov guori Bartulja opet – to bi reć da je zadnji put kad smo triebali sost pada daž do tla, pak nas ni pušto zasost, a sad se šperamo da će bit bolje vrijeme, ku ja, ku ne, mi sopemo, pak kamo puklo da šlo! Kako ča gore se liepo piše, pietak, na dvajsetišiest angošta, jušto na devet ur z večera, sope GRRINTA, Kotkelsi i Lijida Bačić    Se gledamo!

Podijeli - Share

720 dan pokle ča smo se našli, one mesečeve noći na 1. angošta 2009.-te, GRRINTA ima ruojsni dan, kako mali otročić smo se zatekovali od jene bine do druge, kalili smo se kako ćelik, i znali smo da prit će velik, ta zalet ča smo zieli. Svirili smo nebrojeneh koncerti (aš hi niedan ni broja), snimili i hitili van CD, još svirili, doživjeli smo razne metamorfoze, ali smo zavajk bili i ustali GRRINTA.  Magari kad ste nas pitali zač Grrinta, mi bi najraj rekli: “A zač ne!?” I eko nismo se ni obrnuli štabelo, a već so pasala 2 leta, 2 veeela leta. Deboto smo punoljetni. Za 3. rođendan se šperamo da ćemo delat promocijo novega Albuma, zasad još nima ime, ali pjesme se pomalicon krgajo. Eniho! To nedeljo, na devet i dvajseti dva ur, puli Merikan va Mordore (Žminj) će bit Grrintadanski party. Svi ste pozvani, dobro voljo nosite Vi, a torto nosimo Mi. Pijačo nosi Tina. I naravski dress code: “Manje je više, samo dok je Sexy Disco! ”

I samo za kraj želimo reć da finalmente znamo i mi ča jušto pride GRRINTA.
GRRINTA je stanje duha!!!  QQ

Podijeli - Share

Teplo je za vraga, ma to nanke ne muoramo guorit, aš si vi ki nimate klimo znate za ča guorimo. Ku pelješ z klimon va veture špendaš 15% već benzini, a to znači da napraviš 15% kilometri manje, jaaaa. Kroz cielo to vrijeme z Suncen, va naše Garaže je 36°C i do dveh za polnoći je teplo, ma mi ne baciljamo, pridemo, stisnemo zuobi, i delamo pruovi, da budemo pruonti kad pride naš 2. rođendan. A to će brzo, hip ta hip. Rođendan nan je inače na 01.08. pak ćemo Vas avižat na vrijeme kamo da pridete pojest kus torti, do oniput, držte se za jaja, Kuraja!

Podijeli - Share

Liepi naši, pred dva meseca smo Van dali CD, sad je prišla kraj prolića i vireme je od maturanti i fani od GRRINTI. Ta pietak (big frrajdej) ćemo Van povedat ča je bilo torrak pred Vazaan, i ćemo videt ki će nan muorat tornat CD ku se ni štabelo sve pjesme navadi! Ti?  A ti?  Za te ne znan, ali želin verovat da sve znaš! QQ

Podijeli - Share

hojla, opet smo pozvan va gosti, a ovi put na Radio Pulo, kako gosti va emisijo “Gost iz svijeta glazbe” voditelja Ludvika Slane. Nas je zazva da pridemo reć par besied o našen bende, koncerti i naravno o našen prven CD-e Grroti, za kega se šperamo da Van je već liepo sije va uho, aš će brzo bit ispit od Grrinti kade ćemo provjeravat koliko ste se dobro to navadili kantat, ali nu, to nedeljo na 27 marča na frekvencijah Radio Puli na 13:10 (jeno i deset za puolne) ćete moć posluhnut veselo Grrinto, forši anke ča va živo zakantamo. Posluhnite pak ćete nan znat reć kako je pasalo  : )

Podijeli - Share

Eko, tako smo pravi da smo odlučili Van dat da si downloadnete (prezamete) kompletan CD Grroti od GRRINTI va mp3 formate ki je malo bolje kodiran tako da se more pušćat i na radije, imate i plej listo i još neke štupideci nuotre, sučite ta fajl, posluhnite naprov, pak se tornajte napisat kakovo štabelo besedo, ala se čujemo ti dani.

Podijeli - Share

So nas zvali da pridemo do Ceruovlja malo zasos’, i mi smo šli, a buduć da so bile mačkari, smo se i mi zamačkali jeno malico, ni bilo preveć ljudi, ma nan je steši bilo drago zasos, aš nan je dosta da hi je 20 i to je nan kako da hi je 10 000 > 20!
E da, srećno Van Valentinovo i uosmi marač! QQ

Podijeli - Share

Heee, heeej! Smo imeli promocijo CD-a, na 7 .1. puli merikan, i ma ke promocija je bila, kako da smo neki napro veli bend. Ljudi so si kantali s nami, a nanke još CD niso imeli, to je bi jedan šok anke za nas, nismo očekivali da ćete nas tako liepo dočekat. Ča će tek bit kad pridete ponovno na naš koncert, nanke me strah popensat aš će bit raštelamenat. Ubajdi sliki, ala.

Podijeli - Share